D’Geschicht vum Tanja Brück an Dorota Wünsch ass a 17 Sproochen erzielt (Lëtzebuergesch, Albanesch, Däitsch, Englesch, Arabesch, BCMS (Serbokroatesch), Chineesesch, Kapverdianesch, Spuenesch, Persesch, Franséisch, Italieenesch, Polnesch, Portugisesch, Russesch, Tigrigna an Ukrainesch).
D’Buch erzielt d’Geschicht vun enger Frëndschaft tëscht engem Maulef an enger klenger Blimmchen, déi immens gutt richt. Déi zwee ginn onzertrennlech an de Maulef versuergt seng Frëndin am Wanter bei sech doheem, fir datt si am Fréijoer erëm ka wuessen a bléien. Déi aner Déiere gesi just eng aarmséileg Blimmchen, mee dat stéiert de Maulef guer net a fir hie bleift si déi Allerschéinst. Hie kuckt eben anescht op déi kleng Blumm wéi déi aner Déieren.
Dës Geschicht erlaabt et, mat de Kanner iwwer wichteg Theeme wéi Frëndschaft, Vergänglechkeet, Anescht-Sinn, Akzeptanz, Zesummenhalt an awer och d’Joreszäiten ze schwätzen.
Am Set fënnt een d’Buch op Lëtzebuergesch, eng Erklärung zum Zougang op d’Audiofichieren am Streaming an de Link zu den Iwwersetzungen op eduDocs (Accès nëmme fir Léierpersonal, dat beim Projet matmécht).
Dëst Buch bitt sech virun allem fir d’Zyklen 1.2 an 2 un.
